13‏/04‏/2007

حاجات مفرحاني



أول حاجة مفرحاني صدور ديوان صديقي العزيز محمد عز الدين الأول ( شنطة و ضبة و مفتاح ) عن دار أكتب عقبال الديوان المية يا عز و قبل ما أنسى حفل توقيعه هيكون يوم الثلاثاء الموافق 17/4في متحف الفن الحديث – دار الأوبرا - الساعة 6
..................
وسط كـــــــــــــــــــــــــــــل الحاجات اللي موتراني اليومين اللي فاتوا و وسط كم كبيـــــــــــــــــــــر جدا من الفرص الضايعة و الاحباطات المتلاحقة حصل موقف بسيط جدا ً قلب الأمور كلها لشئ ظريف و شعور لذيذ بإن دايما ً فيه حاجة جميلة في الدنيا
واحدة صديقتي من الياهو 360 اسمها هابي هي حد أنا بأعزه جدا ً رغم إننا مش صحاب قوي اتفاجئت بإنها منزلة على صفحتها قصيدة ليا اسمها " السير في اتجاه واحد " النص ده حظه وحش جدا ً حتى معايا ( اللي هو أنا أصلا ً مش معجب بيه و بأعتبره نص عادي ) المهم هي منزلاه و قايلة طبعا ً إنه بتاعي و كاتبة كلمتين جمال جدا ً في حقي
بجد اللفتة دي عملت فيا مفعول السحر
هي مش هتقرا كلامي ده بس أنا حبيت أقولها
شكرااااا.................
انهارده إتعرفت على إكتشاف مش عارف مين يعرفه و مين مايعرفهوش المهم الإكتشاف ده اسمه " سعاد ماسي " مغنية تحفة ( هي اللي أغانيها شغالة ع البلاي ليست دلوقتي )سعاد اتفاجئت بصوتها كنت من فترة صغيرة سمعت أغنية ليها اسمها (و توحشتك ) كان بعتهالي وائل صاحبي و قالي اسمعها و ماركزتش وقتها انهارده سمعتها ع البلاي ليست بتاعتي بالصدفة فدروت عليها و عرفت اسمها و بمساعدة الأستاذ جوجل عرفت عنها حاجات كتير هي مغنية جزائرية اتولدت سنة 1972من صغرها و هي بتحب المزيكا و عشان كده اتعلمت جيتار و هي عندها 7 سنين و درست موسيقى عربية و أندلسية و كانت مؤسسة في فرقة روك اسمها ( Atakor)لكن و زي كتير من فنانين الجزائر في الفترة دي نجاحها لقى سخافة من الجماعات المتشددة هناك و لذلك هاجرت لفرنسا و استقرت فيها و عملت عقد أول ألبوم لها بعد أيام من وصولها باريس
اللي عايز يسمع أغاني ليها تاني ممكن يحمل من هنا
..................
و أخيرا ً بدأت أكتب تاني بعد انقطاع لمدة شهر ( و شهر دي اللي يعرفني كويس هيفهم قد إيه هي كبيييييييييييييييييييرة جدا ً عندي ) المهم رجعت تاني لقلمي حبيبي و ورقي اللي بأقسمه بالطول من النص ( رغم غلاسة بعص صحابي و تريقتهم على الحركة دي ) و فيه قريب أخبار هأكشف هنا لما ييجي أوانها
ادعولي

هناك 17 تعليقًا:

نهى جمال يقول...

اولا مبروك ديوان عز مقريتلهوش قبل كده بس سمعت عنه في الساقية الاربع اللي فات

وهحاول ادعبسله

أما بالنسبة للسير في اتحاه واحد انت ظالمه فعلا أنا شايفه انه مش وحش يامحمد ما تقارنهوش بغيره كل نص ليه جماله ووقته فحبه كده من غير مقارنة بغيره هتلاقيك اعتزيت بيه

اه نيجي للهيروغليفي اللي انا عماله اسمعه من صباحية ربنا ده عاجبني نغمة صوتها والموسيقى رائع جدا

أما الكلام ابقى قابلني لو عرفت اطلع منه حرف هههه يلا ما علينا الجيش بيعمل أكتر من كده

أخر نقطة مبروك رجوع القلم والحرف ووداعا للجدب

تحياتي وعقبال ما ربنا يكرمك وتدخل الجيش كده هههههه وهتلاقي أطلال تكتب عنها

يلا سلام

دعاء عبده يقول...
أزال المؤلف هذا التعليق.
دعاء عبده يقول...

مبروووك جدا لعز وعقبال الحبايب
ومبروووك رجوعك للكتابه
عود أحمد ومحمد

الموسيقى حلوه

محمد مصطفى يقول...

إزيك يا نهى
هتلاقي لينك مدونة عز عندي هتلاقيله نصوص فيها
هأحاول أحب النص قدر الإمكان ... وعد
أما بخصوص الجيش فربنا يسامحك ... قادر يخيب كل الظنون
سلام يا قمر

محمد مصطفى يقول...

أنا مش عارف اسمك عشان لقيتك ماسح الرسالة
بس عامة ربنا يسامحك

محمد مصطفى يقول...

إزيك يا دعااااااااء
الله يبارك فيكي أهه بنحاول يا فندم
أخيرا ً لقيت مناصر للمزيكا
تحياتي

غادة الكاميليا يقول...

ماشي ياعم مصطفى ع العموم كنت عايزة أسجل اعجابي الشديد بالمدونه وبقصيدتك السقوط إلى الأعلى على ما أتذكر مش كده برده بس هرخم شويه لو كان اللى عرفك سعاد سفارى يبقى لازم تسأله مين اللى بعتهالك أوك
وعلى فكرة انت شاعر بجد على فكرة ده حئيئي وسعاد فنانه تحفه وفوق الرائعه زى ما انت اكتشفت تحياتى تالت مرة

غادة الكاميليا يقول...

ممكن أرخم كمان مرة ودى كلمات الأغنيه على فكرة أغنيه فوق الروعه ومن أبرع أغانى سعاد
...............
في هاد الوقت كي الحال كل دقيقة يتبدل..
في هاد الوقت كي وراق الشجر تبدأ تدبل..
و ريحات التراب.. كي تصب شتاء..
دمعة في عيني تلعب.. نتفكرك إنت..

في هاد الوقت كي تغيب الشمس.. و ماتزيد تبان..
في هاد الوقت كي الطيور.. تهاجر الأغصان..
و ريحة التراب.. كي تصب شتاء..
يبان لي طريق طويل ..بلا بيك إنتا ..
ااااااه..

و توحشت و توحشت و توحشتك..
شبعت الويل..
و توحشت ريحة..
مسك الليل..

توحشت الطرقان اللي حفظوني..
توحشت حتى اللي كرهوني..
و ريحة التراب..كي تصب شتاء..
يبان لي طريق طويل.. بلا بيك إنتا..
و توحشتك
..................
ياريت أكون بعمل حاجه مفيده مش مجرد رخامه تحياتى ونتمنى نراكم قريب تانى

محمد عز الدين يقول...

اعتذر عن تأجيل حفل التوقيع إلى يوم الثلاثاء 17/4 الساعة 6 مساءً بمتحف الفن الحديث بدار الأوبرا المصرية
وده بسبب زيارة السيدة سوزان مبارك لدار الأوبرا يوم الأحد وطبعا التأجيل
عمل قومى لمساندة حركة التطور التى تقودها حرم الريس

smraa alnil يقول...

بص انا هحملك امانة

لما تكلم هابي

قولها سيكرت اوف لاف بتقولك مش كانت عشرة دي

وهي هتفهم
ومبروك لديوان عز ورجوعك للكتابه

محمد مصطفى يقول...

غادة الكاميليا عندنا
يا مرحبا يا مرحبا
أولا إزيك
ثم ...
يا فندم الأغنية مبدعة و إن دلت فهي تدل عن ذوق رفيع لمنتقيها و على الفكرة العيب مش عليا العيب ع اللي بعتهالي و ماقالش مين بعتهاله
و ميرسي على كلمات الأغنية
و اتمنى مرورك مايكونش عابر

محمد مصطفى يقول...

عز
علم يا باشا
آه طبعا ربنا يخليلنا سعادتها

محمد مصطفى يقول...

إزيك يا سمرا
يا بنتي يعني إنتي جاية تمشوريني حاضر لما أكلمها هأقولها حااااضر
يعني أي كلمة للراجل اللي قاعد يكتب كل البوست ده و بعدين دبسيني
حاجة عجيبة

متغيرة شوية يقول...

محمد مصطفى باشا الكبير

ازيك يا فندكم

ألف مبروك لعز وعقبالك يا رب لما نروح حفلة توقيعك كده..

ومبروك كمان على العودة للكتابة

هشوفك يوم التلات بقى

محمد مصطفى يقول...

إزيك يا سلمى
الله يبارك فيكي و عقبال مجموعتك القصصية الأولى
إن شاء الله أشوفك هناك
سلام

أخف دم يقول...

ازيك يا محمد
كل سنة وانت طيب وآسف على غيابى عن التعليق الفترة اللى فاتت لانشغالى وتعبى
والبلوج بتاعك يستحق ان الواحد بجد يقراه ويقف عنده
ألف ألف مبارك لمحمد عز حبيبى وسلامى ليه
وربنا يمنع عنك مرض هروب الكتابة

محمد مصطفى يقول...

و أخيرا أشرف توفيق
إزيك يا شاعر
بجد مبسوط جدا إنك هنا
ربنا يمنعه عن لاجميع ياااااااا رب