16‏/09‏/2007

هو الريس فين ؟؟؟




السلام عليكم - هاي سابقا ً - ازيكم .. عاملين ايه


كل سنة و انتم طيبين


معكم محمد مصطفى من إحدي سيبرات شبرا العامرة


نظرا ً لأن الكمبيوتر قل بأصله لأول مرة و فيّـص معلنا ً تعبه مني و من استغلالي له ليل نهار


فأرجو أن يعذرني الجميع على الغياب - إن كان هناك من يهتم بغيابي طبعا ً - و ها أنا أحاول الرجوع مرة ثانية


المهم


من فترة تفشت الإشاعة المغرضة البغيضة المؤذية و المزرية في ذات الوقت


بموت الرئيس المفدى أطال الله عمره - البعض يقول أدام الله عمره - و أنا كمواطن صميم سمعت الإشاعة و تفاعلت معاها بشكل ما


طبعا ً كذبها البعض و أكدها البعض


و أنا لا صدقت دول و لا دول


رغم إني سمعت إنهم جابوا حديث للريس و إنه حضرشوية حاجات عشان يثبت وجوده


الموضوع وقف معايا هنا و شكرا ً مصر


لحد يوم الجمعة الل فات لقيت حاجة غريبة جدا ً مش فاهمها


الي بيتابع الأهرام يمكن يكون أخد باله


الريس بقاله أكتر من 3 أسابيع بتتحطله صور قديمة أو متفبركة


يعني كمثال اللي عنده الأهرام عدد الجمعه اللي فاتت و الجمعة اللي قبلها يشوف صورة الريس اللي في الصفحة الأولى و يركز شوية


صدقوني نفس البدلة - يمكن حد ظريف يقولي إنه من تواضعه معندوش غيرها- لكن نفس الجلسة و حركة الإيد الأوضة بتفاصيلها نفس الترابيزة و الطفاية و الستاير


اللي متغير بقى الشخص اللي معاه


و اللي يركز أكتر هيكتشف إن فيه صورة منهم واضح جدا ً إن حجم الرجل اللي بيكلم الريس واضح إنه متركب و حجمه أكبر من حجم بقية الصورة


كنت طبعا ً عايز أجيب الصور دي عشان أعرضها لكن الأهرام كأي جرنال عربي محترم مخلي خدمة البحث فيه بفلوس


عامة


واحشني يا ريس


اكتشفت فعلا إني بقالي كتير ماشفتلوش حديث ولا خطاب


الواحد بيحس إنه يتيم في غياب الرئيس الضاحك


حبيبي يا ريس



يلا أشوفكم على خير


كان معكم محمد مصطفى


من إحدى سايبرات شبرا

هناك 15 تعليقًا:

عين ضيقة يقول...

حبيبى ياريس

هههههههههه

هو ايه المشكلة ان الريس يموت؟
هو مش ناوى وللا ايه؟

احنا أغرب بلد فى الدنيا

وعموما هو لسه موجود ياعم, الشواهد كلها بتقول كده

ربنا يطول فى عمره ........ ماتقول آمين ... ايه مش راضى؟

طيب

كل سنة وانت طيب بقى وصلح الجهاز

سلام

ملكة يقول...

حقد ونفسنة ودواخل سودة سودة سودة
ماتسيبوا الراجل في حاله ياجدعان ولا انتوا ماينفعش معاكم الطيبة يعني؟
ازاي بتصدق اوشاعات مغرضة زي دي؟
الراجل راح فتح مصنع مكرونة الاسبوع اللي فات عايزين ايه اثبات اكتر من كداهوات؟
وشوف انت بقى لما ريس بحاله يفتح مصنع مكرونة
البلد كلها لازم تفطر وتتغدى وتتعشى مكرونة تحية واحترام للريس ولا هو يروح يفتح المصنع ويتعب نفسه وف الاخر منجاملوش يعني؟؟؟

وعلى رأي المثل
طويل العمر يطول عمره ويزهزه عصره وينصره على مين يعاديه
"اهيء اهيء"
هو ده التعديل الجديد بقى
وكل عام وانتم بخير

صاحب البوابــة يقول...

كل عام وانت بخير

رمضان كريم

تحياتي عزيزي

كرانيش يقول...

ماهو لازم الجهاز بتاعك يبوظ

انت عاوز تبقى فى نيتك تكتب خواطر سوداء زى دى وحجات ممكن تزعل الشعب وتجبله حاله اكتئاب شبه دائمه والكمبيوتر ميبوظش

....


خلى نيتك خير بقه
وابيض يا راااااااااجل
بتشديد الياءوكسر الالف على فكره
ومتحطش نقرك من نقر الراجل
وعيش بقه
سلام ياريس

مادو يقول...

ازيك يا أسماء
و الله أنا مش مصدق الشواهد دي
ماعلينا
أديني صلحت الجهاز اهه يا ستي
و انتي طيبة

مادو يقول...

ملكة
هههههههههههههههههههههههههه
بالتأكيد المكرونة دي مكيسة كويس
و انتي طيبة يا قمر

مادو يقول...

صاحب البوابة
و أنت طيب
تحياتي

مادو يقول...

كرانيش
يا بنتي أبيض من كده هيبقى عندي بهاق
ماعلينا
هأحاول

تحاول إرتداء فستان الخامسة .. لكن قياس المعرفة يمنعها يقول...

ايه السلام عليكم وهاى سابقا دي؟
على العموم هاى عليكم ورحمة الله وبركاته
والله بالنسبة للريس
هو انت ما عرفتش ان فرح ابن العمدة خلص
وبيلموا الطبالين والعالم الظياطة اللى افتكروا ان الموضوع حرية بجد
4 رؤساء تحرير فى خبطة واحدة يا مؤمنين
عادى
الصحفيين الصغننين الى زى حالاتى يعملوا
!!!!!!!!!!!
--------------
المهم
بالنسبة للصورة انا فعلا لاحظت
وكمان فى زيارة لرئيس دولة الايام اللى فاتت مش فاكرة مين
الريس ما استقبلهوش بنفسه
وصورة الاهرام كانت صور ارشيفية
-----------
نبيه يا واد
انت داخل المدرسة وانت عندك كام سنة اسم الله عليك

مادو يقول...

ههههههههههههههه
نيبه و يا واد كمان
يانهار ابيض
هو خلاص بقينا صون فا صو على راي واحد صاحبنا
ماعلينا

مصطفى الحسيني يقول...

مساء الورود يا محمد باشا
مع إنى زعلان منك لانك بتظن ظن السوء فى نزاهة وحداثة وطرافة السيد الرقيق وفى السادة الأنقياء رؤساء الجارئد القومية
وهذا الزعل منك سيمتد لسنوات وسنوات وسنوات حتى يتنين لك بالدليل القاطع ان الرئيس زى الفل زى الفل زى الفل
والسنين والسنين والسنين بيننا

مادو يقول...

مصطفى بيك الحسيني
مساء الفل
أنا لا أجرؤ أبدا
و مطلقا
أنا بس وحشني الرئيس المفدى و كنت عايز أفضفض
بس

mo7amed mamdo7 يقول...

ياباش يخرب بيت الدماغ العالى الصاحى الواعى وعلى فكرة انا احب كده الى يبقى عارف كل حاجة وميقولش اى حاجة زيك كده تمام ربنا يخليك يابرنس

مادو يقول...

محمد ممدوح
أخجلتم تواضعنا يا باشا

日月神教-任我行 يقول...

生鮮宅配 ssd固態硬碟 外接式硬碟 餐飲設備 製冰機 洗碗機 咖啡機 冷凍冷藏冰箱 蒸烤箱 關島機加酒 關島婚禮 關島蜜月 花蓮民宿 彈簧床 床墊 獨立筒床墊 乳膠床墊 床墊工廠 巴里島旅遊 巴里島spa推薦 巴里島機票 巴里島行程推薦 記憶體 產後護理之家 月子中心 坐月子中心 坐月子 月子餐 投資美國物業 美國租金報酬 美國房屋買賣 房地產投資說明會 美國房地產 美國置產須知 美國房屋物件 SD記憶卡