18‏/12‏/2007

عودة


أي حد منتظر بوست جامد و مفيد و منظم و الحاجات دي ما يكملش
أنا فعلا ً مش بأعرف أعبر عن نفسي كويس
مش عارف هأقول إيه أو أبتدي منين بس أنا حاسس إني عايز أنزل بوست
وحشني البلوج و حشني كل الناس بجد
فعلا ً الفترة دي حسستني بقيمة كل الناس حتى اللي بيكرهوا أو بيحاربوا
فيه قصة صغنونة سمعتها من فترة و اتعلقت بيها قوي
كان واحد بيكره واحد جدا ً جدا ً لدرجة لا توصف و كان ليه صديق بيقعد كل شوية يشتكيله من الشخص اللي بيكرهه ده فصديقه يضحك و يقوله إنك هتحبه فيقوله مستحيل فصاحبه يضحك أكتر و يقوله لما يموت هتحبه
فشاء ربنا إن الشخص ده يموت
فقعد الشخص ده يبكي بحرقة جدا ً لموته و يقول إزاي ... إزاي أنا كنت بأكرهه كل الفترة دي ده كان طيب و كان و كان و كان
للأسف مش بنحس بجمال الشئ غير لما بنفقده
رغم كم التعب اللي كنت فيه خاصة في أول أيام ليا في الجيش إلا إن أكتر شئ تعبني هي الوحدة
وحيد وسط 1500 فرد
شئ متعب بجد
أنا الموصوم بالوحدة الاختيارية طول عمره بيعاني من الوحدة
فاكر إني أكتر يوم تعبت فيه كان بسبب إني كنت في أشد لحظات تعبي النفسي و محتاج أي حد أتكلم معاه
فعملت المستحيل عشان أعرف أتكلم
و كلمت حد كنت أتصور إنه الأقرب ليا
فرد عليا بمنتهى البرود فنهيت المكالمة من غير ما أقوله أي حاجة ... ياااااااااااااااااه قد إيه الموقف ده كان متعب
لكن الفترة دي على قد تعبها على قد جمالها
حقيقي فترة مش هتتعوض من عمري
فترة حددت علاقتي بناس كتير و غيرت جوايا حاجات أكتر
بقيت خارج كل الضغوط و بأحدد مين و إيه رقم واحد في حياتي و مين رقم اتنين
و أنا عايز أبقى إيه و ازاي
اتغيرت كتير لكن أزعم إني من اللي اتغيروا بعقلهم
يعني أنا غيرت اللي كنت عايز أغيره في محمد مصطفى
في أول يوم ليا في الجيش جالي هبوط و إغماءة و اتعلقلي محاليل و حاجات كده
إحساس الضعف ده هو اللي اتولد منه إحساسي بالقوة بقية الفترة
ماكتبتش حاجة تذكر
لكن كان فيه حاجات أهم من الكتابة
كان فيه بناء داخلي ليا كمبدع من ناحية و كإنسان من ناحية تانية
حاسس إني هأكتب لو قررت إني أكتب
و لو قررت إني ماكتبش برضو هأكون أفضل
أنا بخير
لو كان فيه حد قلق عليا
الحمد لله
كل سنة و إنتم جميعا ً طيبين

هناك 4 تعليقات:

رينـــــــــــا يقول...

السلام عليكم ورحمه الله
كل سنه وانت با الف خير يارب
والسنه الجايه فى عرفات قول امين

mohamed kamal hassan يقول...

حمدًا لله على السلامة
تجربتك حسستنى باللى عملته ف نفسى من خمس سنين
وكررته تانى من خمس شهور
كان نفسى إنك تعرف تشوف نفسك وتشوف الناس من غير ما تعلق محاليل

مستنى حكاياتك عن الجيش

بس بجد
وحشتنى يا بن الإيه

غير معرف يقول...

اْلف سلامة عليك .....الوصول الى الطريق الذى نريدة شىْمهم لكن الاهم الا نضلة
واْكيد المواقف الصعبة على قد ما بتكون موْلمة قد ما بتعلم فينا وبتعلمنا
ربنا يعينك ويقويك على الجيش
وكل سنة واْنت طيب يا طيب وعيد سعيد

عمر بوك ستورز يقول...

زورونا تجدون ما يسركم، جميع دور النشر عندنا، والكثير من الكتب بأسعار لا تقبل المنافسـة ...

كل عام وأنتم بخير :)