البنت كانت جنينة
والولد شباك
والولد شباك
أو جرح لسه بيلتئم
فإزاي بتستغرب غنا العصافير ف صوته؟
سبحانه من أجرى الغنا ليها!
الولد..
كان حلم سادة بيكره التأويل
والبنت هيصة حنينة
هو الحزين
اللي بيرسم ضحكة تشبهله
أو قوس قزح
من لون وحيد بالطبع يشبهها
"كان نفسي أقابلك صدفة ع القهوة
شاي بالحليب وبتسمعي فيروز
كان نفسي أشوفك بنت بضفيرتين
بتنقطي حزنك على هدومك
وتخبي وشك م الكسوف
والخوف يكعبل لبختك
لما بتجري بكبرياء مهزوز
كان نفسي أقابلك وقتها جدا
كان قلبي طفل عجوز قوي
وانتي الصبية في كل شيئ"
هي الحزينة
إلا وسط الناس
ولمة الفراشات
بتعري ورد الشمس
وبتنزف غروب
فتغني للصبار
هو الوحيد اللي حب
بتسيب غصونها للغنا
تسقيه عينيها بدون شوايب
يقترب.. تبعد
يحاول.. ترتجف
تضحك.. تكشر
تختفي.. ترميه وراها
مش مهم
كل الحكاية..
البنت كانت جنينة
والولد شباك
أو جرح لسه بيلتئم
هو الوحيد اللي حب
هو الوحيد اللي ضاع
هو اللي ما مد يد
للورد لو كان مشاع
هو الوحيد اللي حب
وهي جيش م الهربانين
هو الوحيد اللي حب
وهي أضعف من محاولة حنينة
وأرق من ترحال أخير
في النهاية
مفيش نهاية محددة
ممكن كشاعر مبتدئ
أقفل هنا
ممكن ككقارئ مختلف
تختار نهاية
أو تضيف للنص
ما تشوفه مناسب
أو يفيد في رد سؤال مراوغ
كام موت فاضلك قبل ما تصيبك حياة؟!
ليست هناك تعليقات:
إرسال تعليق