هاكر

واحد غبي سرق الميل بتاعي

غبي لأنه مش هيكسب حاجة

و غبي لأنه ساب الدنيا كلها و سرق ميلي أنا

يا بني حرام عليك

إنت ما تعرفش إن الضرب في الميت حرام

أنا حي

أنا حي ... أنا حي

بجد و الله صدقوني

لكل القلقانين أنا كويس بس تغيبت لظروف السفر

و أظنني سأتغيب بين الحين و الآخر

انتظروني

مش عارف ليه على لساني نص مطر اللي بيقول

صرخت لا من شدة الألم

لكن صدى صوتي

خاف من الموت

فارتد لي نعم

ده مش معناه آاااااااااااااااااااااااااااااااااااااااااااااااااااااااااااااي حاجة أنا لسه سأعيش رغم الداء و الأعداء و احنا الفراعنة اللي بنينا الهرم و الكلام الكبير ده كله

أنا بس مش هأكون متواجد زي الأول

دعواتكم

البقاء لله

اليوم مات معلمي الأخير

مناقشة

عندي مناقشة لديواني " يشبهني تمام الشبه " في جماعة جلسة ثقافية يوم السبت 9/8 الساعة 6,30

لللي ما يعرفش المكان في كافيتريا المجلس الأعلى - الأوبرا

أتمنى أشوفكم كلكم

و أرحب بالمداخلات أتمنى لليوم إنه يكون جلسة لطيفة نتكلم فيها عن الديوان بشكل بعيد عن التعقيد و النمطية فيه قليل من اللك كثير من الشعر

لو حد عايز يراجع ممكن يقرا الديوان هنا

أشوفكم هناك

أنا اتخرجت يا بشر

لقد ربحت القوات المسلحة المصرية رجلا ً من أعظم الرجال
أنا طبعاااااااااااااا
ههههههههههههههههههههههههههههههه

لهذا أفضل الابتعاد

سألني أحدهم عن علاقتي بالمنتديات الأدبية

فقلت له عادية أفضل بعضها و أتابع البعض

فسألني عن قصتي مع منتدى الساخر ( سمع بها من آخر على ما أعتقد )

فسكت كعادتي

و لكني حين عزمت على كتابة موضوع جديد قررت أن أجيب

تابعوا هنا

و لهذا أفضل الابتعاد و الصمت كشمعة تذوب بلا صوت

الصورة تصميم صديقي العبقري سامي

4 يونيو

كل عام

في هذا اليوم بالذات

أتتبعني في صور الحائط لأتعرف على ما تغير في ّ

و أضع حلما ً جديدا ً تحت لساني كيلا تباغتني نوبة إحباط مفاجئة

و أحب صورتها كثيرا ً برغم كل شئ

كل عام و أنا أنا

سنة أولى تدوين

ها أنت يا صغيري تتم عامك الأول
كبرت قليلا و صرت أكثر قدرة على التعامل مع الأشياء
صار لك جمهور لا بأس به خاصة و أنت لاتهتم بالتفاف الجمهور حولك
مازلت في المرحلة السوداء و إن صار حزنك نوعا من الشجن لا يضر بقدر ما يمتع
قاسمتني الكثير من حزني و القليل من فرحي فهو قليل بطبعه كما تعلم
كنتُ مقصرا في حقك كعهدي و كنتَ وفيا كهدك
سامحني إن كنت أسأت و اذكرني إن كنت أحسنت
فأنا كما تدري أحبك
ليس لأنك تشبهني فقط

الابن الأول:يشبهنى تمام الشبه!

صدر مؤخرًا ديوان (يشبهنى تمام الشبه) شعر بالفصحى للشاعر محمد مصطفى :)"اللى هو أنا" عن سلسلة ورقة و قلم

حفلى التوقيع بالمشاركة مع إصدارات السلسلة التالية:

أشجار أفزعها البرق:دعاء عبده

هنجراني : محمد سالم

مكتوب على الحافة: وليد خطاب

و المواعيد كالتالى : الأحد 3 فبراير 2008 بمكتبة ديوان بالزمالك

الاثنين 11 فبراير 2008 بفرع مكتبة ديوان بمصر الجديدة 105 شارع أبو بكر الصديق فى تمام السادسة

ادعولى،يارب أكون موجود و أشوفكوا هناك و عقبى لكم

تحديث :

أنا جاي أكيد يوم الإثنين إن شاء الله

منتظركم جميعا

يوم يستحق التأريخ

أنا سعيد

ممكن تدعولي جدا

sway

شارلو أيها العبقري

كنت من الأجيال المحظوظة التي حفلت بعرض التليفزيون المصري لأفلام لشارلي شابلن و لوريل و هاردي و توم و جيري في نسخها القديمة و كذلك العديد من الأفلام الكرتونية لوالت ديزني و التي أعجب لإختفائها و ظهور موجة اخرى من الأفلام على غرار كونان و يوجي و غيرها

كان شغفي بتلك الأفلام مهول و مازلت برغم التطور المذهل في التقنيات و التأثيرات إلا أن لتلك الكلاسيكيات روعتها بخاصة شارلي شابلن بقبعته و عصاه المميزتين و حركاته التي كتبها باسمه في وقت كانت السينما فيه بكرا ً لم يمسسها التقليد فأبدع و اخترع ما عاش عليه كوميديو السينما حتى الآن كهذا المشهد الذي صار علامة مميزة في مئات الأفلام

و مازلت أعجب من عبقرية هذا الرجل القصير النحيل الذي ترك عالما ً من الحركات و التقنيات لا يمكن لفيلم أن ينجو من تكرار أو اقتباس شيئا ً منه بل و أحيانا ً كانت تنقل حرفيا ً أفلام بكاملها كفيلم إسماعيل ياسين " إنسان غلبان " الذي هو في الحقيقة فيلم " أضواء المدينة " أحد أهم و أمتع أفلام شابلن و الذي استمر تصويره 3 سنوات كاملة و عاد أحد مشاهده 18 مرة و بسهولة تامة ينقل هذا المجود حرفيا ً

- المشهد الذي أعاده شابلن 18 مرة ليظهر أن البنت عمياء بدون استخدام الصوت -

و هناك من نقل بعض المشاهد أو على الأقل استفاد مها في رسم شاهده مثل علي الكسار في فيلم " سلفني 3 جنيه " و هو مشهد المصارعة المنقول إلى حد كبير من فيلم " المصارع "

بجانب العديد من المواقف التي صارت بعد ذلك علامات مميزة في فن الكوميديا و التي اقتبسها العديد من النجوم و تعلموا منه فلسفته في الكوميديا فصارت طريقهم للنجومية على اختلافهم كإسماعيل ياسين و علي الكسار و عادل إمام و محمد صبحي و ويل سميث و روبن ويليامز و جيم كاري ... إلخ

شابلن ذلك العبقري الذي أثبت أن الفن قوة كقوة الحروب و الذي هدده هتلر بل و حاول اغتياله ليصمت ذلك القزم الذي يستغل تشابههما و يتهكم عليه و على الحروب فما كان رد شابلن إلا أن أتحفنا بتحفته " الديكتاتور " عام 1940 و النازية في أوج عظمتها

أحبك يا شابلن

لمزيد من المعلومات

سينماك

خالد عبد القادر

نادرا ً جدا ً لما فرحت لحد فاز في مسابقة خسرت فيها


اممممممممممممممم


غالبا ً بيحصل لو كان صاحبي قوي قوي


امبارح لقيتني مبسوط مبسوط بجد يعني من جوايا


رغم مييييييييييييت حاجة المفروض تحزني

يكفي مثلا ً كمثال

رايح أسلم نفسي في الجيش تاني يوم


مسابقة أنا عارف مسبقا ً إني خسران فيها


بس بجد كنت فرحان


الطريف بقى إن خالد مش صاحبي من زمان


و يمكن ما قعدناش مع بعض الفترة اللي هي يعني


لكن هو من الناس اللي اقتحمت حياتي برغبتي


مش بأعرف عبر عن اللي أنا عايزه كويس


فكده كفاية و بس خلاص


مبروك يا خالد جايزة الساقية و يا رب تكون بداية و تجمد كده بقى عايزين جوايز كتر و حاجات كده


يلا سلام

أنا كسبت يا بشر

آه و الله تخيلوا

المهم إني كنت متأكد إني مش هأكسب

أنا أصلا مش بتاع مسابقات من أول ما قلت يا مسابقات و مش بأكسب حتى لو كنت إييييييييييييييه

و في أفضل الظروف بأكسب بس مش بأكون الأول يُقال إنه عمل سفلي

المهم المعجزة حصلت يظهر

فنقلا ًعن مدونة محمد كمال و بالتأكد الشخصي منه وصلني ما يلي

تتشرف ورقة وقلم -تجمع أدبى غير هادف للربح - بأن تعلن نتيجة سلسلة ورقة وقلم و أسماء الكُتاب الذين تم اختيارهم لنشر أعمالهم الإبداعية بالدفعة الأولى من السلسلة، وهم
أولاً: فى مجال القصة القصيرة
القاص/ ولــيــد خــطــاب
عن مجموعته مكتوب على الحافة
القاصة/ دعــاء عــبــده
عن مجموعتها أشجار أفزعها البرق
ثانيًا: فى مجال شعر العامية
الشاعر/ مــحــمــد ســالــم
عن ديوانه هنجرانى
ثالثًا: فى مجال شعر الفصحى
الشاعر/ مــحــمــد مــصــطــفــى ده أنا طبعا
عن ديوانه يشبهنى تمام الشبه
رابعًا: فى مجال الرواية
حُجبت
خامسًا: فى مجال النقد الأدبى
لم يتقدم أحد
سادسًا: فى مجال الكتابة المسرحية
لم يتقدم أحد
كما حُجب العمل الثانى فى كلاً من شعر العامية وشعر الفصحى

_______________________

ورقة وقلم تتقدم بخالص التهنئة إلى السادة الكُتاب الذين تم اختيار أعمالهم المميزة للنشر بسلسلة ورقة وقلم وبخالص تمنياتنا لهم بمستقبل وافر المجهود والنجاح، علمًا بأن أعمالهم سوف تبدأ طباعتها خلال أيام

ده بالنص من مدونة محمد كمال

بجد مش مبسوط إني هأشوف شغلي مطبوع قد مانا مبسوط إنه هيكون جنب شغل الناس دي و قد مانا مبسوط إني هأشوف شئ عاصرته و كنت أتمنى إني أشوف نجاحه

مبروك لكل من

وليد خطاب

دعاء عبده

محمد سالم

مبروك لمحمد كمال و مصطفى الحسيني

و مبروك ليا يعني أنا اللي ماليش نفس

انتوا مين ؟؟؟؟

من يوم ما ركبت عداد الدول عندي في البلوج و أنا هاتجنن

كل يوم يقولي جالك عدد كذا من دول كذا و خد عندك بقى حبة من أمريكا و شوية من إيطاليا على القليل من هولندا و أسبانيا و فرنسا و أخيرا بقى فيه موريتانيا و أفغانستان و أذربيجان بخلاف مصر

طبعا ً مبسوووووووووووط جدا ً إن فيه ناس بتابعني و خاصة لو من دول تانية

لكن مندهش جدا ً و مستغرب الناس دي عرفت البلوج منين و ليه بيتابعوه و ليه مش بيسيبوا كومنتات

امممممممممممممممممممم

ممكن نتعرف ؟؟؟

يا ريت كل واحد يدخل البلوج يكتب البيانات دي كنوع من التعارف و اللي يحب يلنـّك معايا إيميلي في البروفايل

الاسم

اسم المدونة و لينكها إن وجد

البلد

الهوايات

عرفت منين البلوج بتاعي

من إمتى

ليه بتتابعه

بتتابعه بمعدل قد إيه

إيه أكتر حاجة بتعجبك فيه

و من يزد فله الأجر و الثواب طبعا

أرجو إن الناس تتفاعل و تسيب إجابات

تحياتي للجميع

تحديث

ده بجد على فكرة

فاكرينهم

مش عارف ليه جم على بالي

بجد مكانوش شخصيات كرتونية و أنا بأتناولهم مع الفطار و بأعيش معاهم كل يوم على القناة التانية يمكن كانوا أصدقاء أو إخوات كلهم

حتى الشخصيات الشريرة و الغبية اللي كانت فيهم

قد إيه كان بيعجبني هدوء و رزانة كيرمت

و جمال و أناقة ميس بيجي

و فوضوية أنيمال

و غباء الطباخ السويدي

و قلة حيلة بيكر

و

و

و

لحد فترة قريبة كان عندي معظم الشخصيات دي لعب و كنت محتفظ بيهم مش عارف دلوقتي هم فين

محمود أخويا رغم إنه ماحضرش المابيت شو إلا إنه بيحب جونزو جدا ً و هو لعبته المفضلة و عامله هدوم و سرير و

جايبله عروسة و مظبطه ع الآخر يعني بس مسميه عوكل

تخيلوا بقى من جونز لعوكل

آدي أخرة التمصير و التعليم المجاني

جيل آخر زمن

ملحوظة الأغنية الأخيرة دي أغنيتي المفضلة في المابيت شو كله و تعبت جدا ً لحد ما لقيتها

مستني رأيكم

و مستني أعرف كنتم بتتفرجوا على إيه و إنتم صغيرين

تحديث

فيه بوست جديد في بلوج معانا

الحقوه

معانا ؟

يا هاي

بصوا سواء معانا أو مع الناس التانيين

مستنيكم كلكم في البلوج الجديد

بلوج للتصميمات و الإضافات المختلفة اللي بيحتاجها البلوج

سلام

أشوفكم هنااااااااااااااااااااااااااااك

افعص اللينك

معانا ؟

التاج علينا حق

هاي جميعا

إزيكم

لقيت حسابي تقل على رأي واحدة صاحبتنا قلت أخلص التاجات اللي عليا كلها في بوست واحد و ربنا يجعلها آخر التاجات

عندي تاجين من وشوشني هنخش عليهم الأول و بعدين نكمل

1

مين أكتر ست أشخاص بتحبهم؟؟

هم كتير بس عشان نرتبط بستة بس

يبقى محمود رجب ده أقدم أصحابي

ماما و دي ماما يعني

أخويا محمود "شوتشا" و ماحدش يقوله كده عشان بيزعل

ههههههههههههههههههههههههه

بنوتة مش هأقول اسمها

محمد كمال حسن و مصطفى الحسيني الاتنين شروة واحدة كده لأني اتعلمت منهم كتير

هل أنت سعيد؟؟

لأ طبعا

لو اجتمعت مع حسني مبارك في مكان واحد هتعمل ايه؟؟

هأضرب أمه

- سوري لذوي المشاعر المرهفة -

بتحب مصر؟؟

امممممممممممممممممممممممممممم

أكيد

بس مش بأحبها الحب بتاع يا أحلى اسم في الوجود و لا ماشربتش من نيلها بأحبها حب عقلاني من نوع

و من هو بادلٌ وطنا ً بأرقى

كمنتحل ٍ أبا ً أعلى نصابا

فما الآباء تختار اختيارا

و ما الأوطان تنتخب انتخابا

مصر الوطن اللي اتولدت فيه و ليا ذكريات فيه فطبيعي إني أحبها خاصة إني مؤمن إننا مش بنحب الشئ أو الشخص لأنه الأفضل لكن بنحبه لأننا بنحبه

انت مسلم؟؟

الحمد لله

ليه؟؟

كنت في الأول مسلم لأننا مسلمين

لحد ما بقيت قادر على التفكير و التساؤل فسألت نفسي أنا مسلم ليه

تهت شوية و بعدين قريت حبتين في الديانات الأخرى - يمكن حتى ثقافتي الإسلامية أقل من ديانات تانية - بس لقيت راحة في الإسلام

رغم إني مقصر جدا ً لأبعد حد

مين اكتر شخصيه مش تقدر تستغني عنها ؟؟

محمد مصطفى

أكتر موقف محرج؟؟

ههههههههههههههههههههههههههه

كنت مع البنت اللي قلت عنها فوق لأول مرة

و هي مش من القاهرة فأنا دبلومة في المترو بقى و خمس سنين دايسك يا محطات

المهم ركبنا المترو رايحين حتة معينة فقالتلي نبص على اليفط و كده

فضحكت جدا طبعا

المهم ركبنا و ماخدتش بالي إننا روحنا الإتجاه الغلط

طبعا ً كان شكلي ربنا ما يوريكم

بس عادي عدت

هههههههههههههه

الأمنيه اللي تتمنى تحقيقها؟؟

أعرف أكتب شعر

وأمرر التاج لميييييييييييييييييييييييين؟؟

في الآخر هأمرر كل التاجات

2

التاج التاني اختبار لإدمان التدوين

و كانت النتيجة كالتالي

90%

Mingle² -

طلعنا مدمنين و الحمد لله

ماحدش يفتن بقى

الاختبار هنا للي عايزه

كدا بح يا وشوشني

نخش على بريك و ربنا يجعلى كلامنا خفيف على كل الصيادلة

3

اسم مدونتك ؟؟

أحدهم

لماذا اخترته..وماهي نيتك من وراء اختياره؟

أنا كنت كاتب تفسير ده في الأول في الهيدر و بعدين شيلته

أنا مقتنع إننا نتاج دخول أحدهم في حياتنا

أصلا اللي أتى بنا للوجود هو أحدهم

و اللي بيسرق أحلامنا الملونة هو أحدهم

و اللي بيسرقنا إحان أصلا من اللي بنحبهم هو أحدهم

لذا قررت أكون أحدهم

هل فكرت في إغلاق مدونتك؟..والسبب؟

لأ

استحليت الحكاية بصراحة

صورتك في المدونة..رمزيتها؟

غيرتها كذا مرة

يمكن لأني متقلب حبتين أو لأنها المفروض تكون معبرة عن شئ فيا فلذلك بأدور دايما على الأفضل

لكن استقريت على الصورة الموجودة حاليا

واحد مش باينة ملامحه و إن كانت تبين بعض حالته

لماذا دخلت عالم التدوين من الاساس؟

امممممممممممممممممم

الأول كانت صدفة

كنت مدون على ياهو 360 بما إني مهتم بإيميل الياهو و أهي حاجة نتعرف بيها على ناس جديدة

لكن بعد كده حسيت إن التدوين لطيف

عالم مسحور زي بتاع أليس في بلاد العجائب

بتصنعه زي مانت عايز و بتقول فيه اللي إنت عايزه

احلى جمله قيلت لك فى وصف مدونتك؟

إنها أنا

طبعا ً مفيش أحلى من كده

التعليقات بالنسبه لك ..أهميتها؟

في مجملها مهمة جدا

التدوين زي الفن لابد له من جمهور له رأي من المهم جدا ً إنه أعرفه

بتفرق بقى حسب الظروف

يعني لو البوست نص ليا بأبقى مهتم جدا ً أكتر من البوستات العادية برأي الناس

كمان بصراحة كل واحد بيكون فيه ناس بيهتم بإنه يسمع رأيهم و بيكون لرأيهم أهمية عنده أكتر من أي رأي تاني

أحلى بوست كتبته ...ضع اللينك ..ثم أذكر لماذا؟

بوست بعنوان " مش مهم "...أما ليه بقى فكنت بأكتبه و أنا متضايق جدا ً من صديق عزيز عليا و لو كنت قابلته وقتها كنت هأضربه بس البوست ده خلاني هديت شوية رغم إني قليت أدبي حبة و حسيت إني انفعالي حبتين

أفضل مدونة قرأتها؟

غادة الكاميليا

أفضل بوست قرأته؟ وضع لينكه؟

انتظار

و

ولد مواليد واحد وثمانين يقابل بنت مواليد سبعة وثمانين

و

تخيل يا أبي ... كل هذا حدث

و

مووووا وادي بوسة لصاحب الضربة الجوية الأولى..والأخيرة

و

وجه لشخص آخر

ممكن تنقي اللي يناسبك

حد قل ادبه فى التعليق..ايه رد فعلك؟

آه

واحد رخم في بوست و رديت عليه برخامة لقيته بيرخم تاني تجاهلته طلع ابن ناس و احترم نفسه و ماعتبش البلوج تاني

أسوأ مدونة؟

أي مدونة تسوق في قلة الأدب أو ازدراء الأديان و الإساءة ليها

و للأسف بقوا كتير

أسوأ بوست..أسوأ مدون؟

أسوأ بوست كان لبنت بتتكلم عن حقوق المثليين باعتبارها منهم و اتضايقت أكتر لأنها واضح إنها محترمة

أسوأ مدون واحد اسمه مدونته قليل الأدب أصلا ً - طبعا ً مش هأكتبه - و المدونة محتواها مش بعيد عن الاسم بالتأكيد و غاظني جدا ً إنه بيكتب ما يشبه الشعر

ايه اللي هيحصل لإيميلك لما تموت؟

هيبقى يتيم

اديتى الباسوورد لحد قبل كده؟

آه مرة واحدة و مش هتتكرر على ما أظن

بس ده مش لأن الشخص ده أساء

كانت إيه طبيعة علاقتك بيه؟

ههههههههههههههههههههههههههههههههه

آدي بقى رخامة التاجات

هي هي نفس البنت

ارتيحتي

اسمك؟

محمد مصطفى حسين

المشهور بيه وسط اصحابك؟ا

محمد مصطفى

و أحيانا ً مصطفى بس

لكن على النت مادو

عمرك؟

22

و فيها كلام

برجك؟

الجوزاء طبعا

مجال دراستك؟

المحاسبة

شخصيتك نوعها إيه؟

هادئ و عاطفي و يقدس الحياه الزوجية

ههههههههههههههههه

أعتقد أهم حاجات إني عصبي و متقلب و مش صبور و بأوصل بأوصل لأي شئ أنا عايزه بسرعة جدا ً و بأسيبه بسرعة بس قلبي أبيض

و بأروق بسرعة مش معقولة

السفر بالنسبة لك؟

أمنية حياتي

وقت فراغك بتعمل فيه إيه؟

حسب يعني ممكن أكتب أو أقرأ أو أشخبط - أرسم يعني - أو أسمع أغني أو أتفرج على معارض فنية أو أحضر ندوات

كده يعني

الاكلة المفضلة؟

ههههههههههههههه

أي شئ خارج من الفرن

و بأقدر الفراخ البانيه جدا

الصفات اللي أخدتها من بابا؟

حاجات كتير للأسف

أهمها العصبية و السعي المتعب للكمال

الصفات اللي أخدتها من ماما؟

يمكن إنها بتسامح أيا كان الذنب

أكتر ست حاجات بكرهها؟

الظلم

الانتظار

المفاجآت

الضعف

الوحدة

حد تساعده فيضرك

أكتر ست حاجات بحبها؟

السفر

الشعر

سريري و الكمبيوتر بتاعي الشهود على ميلاد أي نص ليا

حد يعمل حاجة عشاني من غير ما طلبها منه

البحر بالذات اسكنرية و القعاد فوق سور القلعة الفرجة على شكل المراكب

الانترنت بالنسبه لك؟

شئ مهم جدا من غيره الكمبيتر بيبقى أتاري فاميلي

أمرره لمين؟

لكل من

بريك و وشوشني التاجات اللي معملوهاش

محمد كمال حسن

مصطفى الحسيني

دعاء فتوح لما تشغل بلوجها

غادة الكاميليا

كرانيش

رانيا منصور

إبراهيم عادل

شيكو

علا الساكت

محمد عبد السميع

نهى جمال

تصاميم ببلاش

من فترة و أنا بأفكر في الموضوع ده بصراحة

واحد صديق حاول يقنعني إنها " سبوبة " كويسة بس بصراحة أنا مقتنع إنها متعة شخصية

حاجة بتظبط مودي شوية وسط كم الخراب اللي هو فيه دايما

و بصراحة أنا مش وش فلوس و سبوبات و البتاع ده

أققضيها حاف بس أعمل اللي في دماغي

و أنا مش بأشتغل أنا بأفن

بأبدع حتى لو ماعجبش إبداعي حد غيري

ثم ده يعوض إني مابقتش بأعرف أرسم زي الأول

و بصراحة مش هأضحك على نفسي أكتر من كده

" أنا مش هأعرف أرسم زي الأول أبدا "

يلا و الله كنت موهوب زمان

مش مشكلة بقى

المهم

أنا قررت أصمم بلوج لأي حد محتاجه مجانا

و إن شاء الله يعجبه و يطلع أجمل مما يتخيله كمان

هأفتح بلوج تالت كمان أسبوع إن شاء الله أتلقى فيه كل الطلبات

انتظروني

و اللي مستعجل ممكن يبعتلي ع الميل

أنا محتاج بس تصور كل واحد عن بلوجه

لونه

صور عايزها تكون موجودة

مود البلوج

شوف إنت عايز تقول في التصميم إيه

و أنا هأعمله

و على فكرة أنا ممكن أعمل البلوج ميت مرة المهم إنه يطلع مرضي لصاحبه

تحياتي للجميع

بكاء

للوقت طعم رهافة السكين

و الدموع لن تـُفضي لهم بتوجعك

فمت سريعا ً ليس فيهم منقذك

اكتشفت إني بقالي كتير ما بكيتش