29‏/05‏/2008

نهايات عادية جدا


1

بيلاقوا بعض
كورنيشهم المزحوم بيندههم

- تعالى
استنِّتك أخرت ليه ؟؟؟
و يضمهم 
البنت أجمل من معاد القبض
و الواد برئ جدا ً 
بيشدوا خطوتهم لقا 
ف الشارع المفروش فراق
بيحبها / بتحبه طبعا ً
،قصة تشبه أي قصة
كأي قصة بيبعدوا
و يسيبوا بعض بدون سبب
يشتاقلها 
تشتاقله جدا ً
يرجعوا
بوشوش جديدة يدورا
يمكن تدوس على رجله صدفة
فتعتذر
أو تسأله عن واد برئ
مش فاكرة شكله 
فتبتسم ف عينيه حكاية 
و بنت أجمل من معاد القبض
تاهت
- تعرفه 
- لا ...
تعرفيها ؟؟؟
- ...
يسيبوا بعض بدون سبب
" أنا كنت أطيب من شريطة ف شعرها "
" أنا كنت أصدق من عينيه "
طبعا ً هينساهم هواهم
يمكن الكورنيش يكون شاهد وحيد 


2

النور بيزحف فوق إيدين الشحاتين

والقهوة فاضية

بتتفح يومها الجديد

وياه بأحاول مانكشفش

- البنت تكسب

- مستحيل ...

البنت مش ممكن تقش

*****
كان دور و شايب تاه ما بين باقي الورق
شديتها من ايده الشمال

خبيتها تحت التسعة لا يشوفها الولاد

فنتشها بالإيد اليمين

نفس ابتسامته

شوفتها ف عينيها

ما قدرتش أرد

*****
[البنت - لو عازت - تقش
]3

الدوشة بتساعده

ف إعادة رسم صورته كل لحظة

و إنه يخفي الغربة ف عينيه

لو عينيها اتململت

طبعا هيرفض يعترف بالفرق

ف محاولة للكدب الصريح

نفس الجونلة

و نفس نوع برفانها

و ف نفس الأماكن و الموسيقى

يمكن هيختارها بنفس الإسم

أو نفس الملامح

كل شئ هوَّاه

و ماتغيرش غير إحساسه هو

و شئ بيرفض يقبل التبديل



4

الشمعدان هيكون مهيب

و عينيه بتنزف بالدموع

و أنا بأحتفل بفراقنا

و أقتل شمعتين

يمكن هيترحم عليهم

أو علينا
أو سذاجة موقفي

وعينيه بتحكي بصوت قريب للسكوت

" مش رحمة تقتل شمعتين ...

وسط احتفال "

هناك 7 تعليقات:

ريحانة يقول...

مش باعرف اقول كلام لما حاجة تعجبنى اوى


وبنت احلى من معاد القبض



انا كنت اطيب من شريطة فى شعرها



لو حاقتبس يبقى كتييييييييييييير



حلو اوى يامادو
حلو زيادة:)

smraa alnil يقول...

عذرا اسفة
بعيدا عن الموضوع


ارجو المشاركة في ما اعلنت عنه في مدونتي

تحياتي

عين ضيقة يقول...

رغم انها
نهايات عادية جدا
الا انها عجبتنى


أنا كنت أطيب من شريطة ف شعرها "

يخرب عقلك على دى

تصدق إلك وحشة؟

moony يقول...
أزال المؤلف هذا التعليق.
zahra يقول...

الله عليك
بجد تحفه
عجبونى جدا لكن ليه دايما النهايات الطبيعية و العادية نهايات حزينه

moony يقول...

لالالالالالالاايه النص المشكلة ده؟؟؟يجنننننننننن
ولون جديد عليك,اعتقد دى اول مرة اقرالك عاميّ..بس جميل
"بيشدوا خطوتهم لقا
فى الشارع المفروش فراق!!"لالا تعبير ا..ا...مش عارفة والله اوصف روعته بايه.
"يشتاقلها..تشتاقله جدا"هنا حضرتك اكيد سكنتك روح بنت وانت بتكتب التعبير ده
"بنت اجمل من معاد القبض؟؟"لا واضح ان الحياة العملية لها تأثير كبيييير.البنت فى جمالها او "الحبيبة"فى جمالها اللى بتحسه الروح والقلب مش العين مش ممكن تتقارن بميعاد القبض....

" أنا كنت أطيب من شريطة ف شعرها "
" أنا كنت أصدق من عينيه "

مشكلة مشكلة مشكلة..وانا اللى كنت فاكرة انى معدش فيه كلام ولا تعبيرات جديدة ممكن تتقال!!شكرا لأنك أحبطت توقعاتى...
كمان عجبنى قوى التعبير ده" النور بيزحف فوق ايدين الشحاتين"متممممممكن

بس اسمحلى ان مفهمتش المقطعين3,4
يمكن تكون فكرتهم أو صياغتهم غامضة شوية
"وباختياره هتبقى نفس الاسم؟؟"يعنى ايه؟
هى دى نفس حبيبته الاولنية ولا واحدة تانيه هتاخد مكانها؟؟!!!

يمكن اكون منجحتش فى فهمالمقطعين دول قوى..اعذرنى لكنى اكيد كنت قادرة احس بروعة معاني القصيدة ككل, واتلمس طزاجة صورها وألفاظها لدرجة انى اصريت اقراه تانى وتالت لأنه عجبنى وعشان اكتب تعليق واعى وشامل لنص يستحق كل الاهتمام والاعجاب..تصفيييييييييق حاااااااد.على فكرة انا كنت علقت قبل كده صحيح على بوست "كأنه أنا".بالتوفيق دائما ان شاء الله.السلام عليكم ورحمة الله وبركاته.

غير معرف يقول...

الغربة توهة ومرار...وسجن من غير قضبان

واْروع مقطع عجبنى جدا...

الشمعدان هيكون مهيب

و عينيه بتنزف بالدموع

و أنا بأحتفل بفراقنا

و أقتل شمعتين

يمكن هيترحم عليهم

أو علينا

أو هيسكت من سذاجة موقفي

فعلا نهايات عااااااااااادية جدا
...الاْن اْدركت اْنى مفارق (اْالدهر مفرقا)فلما البقاء!
ساْحيا عابر سبيل ربما يمر من هنا لكنة لن يكون هنا

"طيف عابر"