29‏/03‏/2007


استنعنا على الشقا بالله

أسخف 3 حاجات ممكن تقابلهم في حياتك

حاجتين

حد يدبسك

ربنا يجازي اللي كان السبب

المهم

وصلني من الصديقة العزيزة جدااااااااااااااااااااااااا سمراء النيل 3 تيجان ( ربنا يحرق اليهود ) و طبعا ميرسي ليها جدا يعني حقيقي حقيقي مش عارف أوصفلها سعادتي

ماعلينا

ندخل ع التيجان بقى

اديني سلو موشن و موسيقى سلو و أنا ماشي أتدلع أحل التيجان

الأول

هل كنت طالب شاطر في المدرسة ؟

في المدرسة آه

و بعدين أنا من اللي ربنا إنتقم منهم بإنهم يبقوا في مدرسة باباهم أو ماماتهم شغالين فيها

كانت ماما شغالة في حاجة اسمها القطاع ( حاجة كده تبع الإدارة التعليمية ) و مكتبها في المدرسة بتاعتي و خد عندك بقى لما نشوف إنت و لا ابن أبله س أو نشوف إنت ولا ابن أستاذ علان ...دي حاجة

غير كده أنا كنت بأحب الرسم جدا ً و أنا صغير و كنت بأدخل كل المسابقات فكان لازم أبقى متفوق عشان مايوجعوش دماغي

ده لحد ثانوي أو بمعنى أصح لحد ماتعرفت على المدعو بلاي ستيشن إلى هنا و توقفت مسيرة النجاح رغم إني في الثانوي قررت أسيب النشاط خاااااااااااااااااااالص ( هو مش كده بصراحة أصل أوضة النشاط في ثانوي كانت وحشة قوي فأنا قرفت منهم )

إيه أحب مادة و أكره مادة ليك في المدرسة و الكلية ؟

بصي هو في المدرسة كله كان فل بالذات الرياضة ( أي حاجة فيها أرقام ) و مكانش فيه مادة ممكن أقول عليها أكره مادة يمكن عشان أنا كنت ذكي طبعا و يمكن لأن المنهج كان عبيط

في الكلية برضو أي مادة فيها أرقام و أكره مادة أي مادة نظري بالذات اللي من نوع هي كده خنييييييقة جدا

كنت عايز تطلع إيه و أنت صغير ؟

مهندس

تخيلي طموحات 16 سنة ياخدها التنسيق في غمضة عين و بفرق 1,8% حاجة خنيقة جدا الأخنق إني جبت مجموع نون جميلة و فنون تطبيقية بس سقطت قدرات فنون

بجد طول عمري نفسي أطلع مهندس و مش أي مهندس ... مهندس من اللي بيبني البيوت كان ليا خال بأحبه دوننا عن الكل لا لشئ غير إنه مهندس بيبني بيوت

يلا ... خسروني

سمعني بقى كونشيرتو زفير طويييييييييييييييييييييييييييييييييييل و أنا بأدخل على تاني تاج

هههههههههههههههههههههههههه

إيه التاج العجيب ده

لامؤاخذه يعني أجاوب بإيه على حد بيسأني إيه أول فكرة بتجيبني بعد ما أقع في المحظور ؟؟!!

عييييييييييييييييييييييييييييييييييييب

حضرتك أنا مش كده خالص

أنا نفسي أعرف مين اللي عمل التاج ده

المهم

أنا هاخش ع اللي بعده

ادخل بقى بمزيكا فرايحي كده و لتكن سلام صعبت عليا نفسي و أنا داخل تالت تاج و لاهاممني

هل تسعد عندما يمرر لك أحدهم تاج ؟

استحالة يابنتي لأني أنا أحدهم و مفيش حد غيره كده

أما لو قصدك يعني لو ( حد ) بعت لي تاج

أنا رديت في أول الموضوع بس اللي هو عادي هأبقى عادي

هل مقدار سعادتك أو شعورك أيا كان عند تمريرك التاج يختلف حسب المدون الذي يمرر لك التاج ؟؟

مافتكرش لأن أي حد هيبليني بتاج مش هيكون بيحبني و إلا ماكانش يعمل كده و لذلك هأقوله غير ربنا يسامحك

بس انبساطي بقى لما بأمرره لحد بالذات لو تاج من عينة شعورك إيه بعد الوقوع في المحظور خاصة لما أمرره لواحد بأحبه بأبقى منشكح جدا

هل تستمتع عند إجابتك على أسئلة التاج ؟

جداااااااااااااااااااااااااااا

ربنا يحرق اليهود

هل ترى للتاج أهمية ؟

لأ

بس بيبقى لذيذ لما أحرق دم حد بيه

يلا ... خلي الأولاد يلعبوا

هل فكرت في عمل تاج خاص لك من قبل ؟

آه أصلي وقعت ضحية تاج قبل كده بس ع الـ 360 ْ ( انتقام يعني ) بس كبرت دماغي و قلت حرام ...

لكن دلوقتي بدأت أفكر

هل تفضل قراءة أجوبة التاج عند المدونين الآخرين ؟ أم لا تهتم سوى بالتدوينات الأخرى فقط ؟

طبعا هأهتم بقراءة الأجوبة من باب التشفي و الفرجة على المصايب

هل تحرص على قراءة إجابات من تمرر لهم التاج ؟ و هل تغير إجاباتهم للتاج شيئا ًَ في إدراكك لهم ؟

نفس الإجابة اللي قبلها بس لما بيبقى تاج محرج أو سمج بأتابع أكتر

مافتكرش إني بأغير وجهة نظري فيهم مانا بأهيس من أول البوست أهه حد اتكلم

هل تلتزم حرفيا ً بأسئلة البلوج ؟

إنتي شايفة إيه ؟؟!!

ما هي نوعية الإجابات التي تفضلها ؟

شوربة الفراخ

إلى من تحرص على تمرير التاج ؟

كل البشر اللي أنا بأعزهم معزة تكفل لي حق الانتقام

تمرر التاج لمين ؟

آآآآآآآآآآآآآآآآآه

حانت لحظة الحسم

سمعني سلام آمنت بالله و ألضم فيه ذئاب الجبل

أمرر الـ 3 تيجان ( التيجان كلها في بلوج سمراء النيل عشان ما حدش يقول ماعرفش )

لـــــــــــــ










هناك 17 تعليقًا:

Abd El Rahman Magdy يقول...

حبيبي
متشكر جدا على تمرير التاج (ربنا يسامحك يا جدع)
سوري عشان ما جاوبتش عليه بس كنت الفترة اللي فاتت مشغول جدا جدا
هه
استعنا ع الشقا بالله

محمد مصطفى يقول...

إزيك يا عبووووووووووود
أتمنى لك تاجا ً موفقا ً
ههههههههههههههههه

محمد عز الدين يقول...

صدقني مش هجاوبه
والنبي
يا عم هو احنا ناقصين
ههههههههههه
ع العموم يا باشا متشنكرين
وتتردلك في التاجات
سلااااااام

smraa alnil يقول...

ههههههههههههه
انت يا واد شكلك كدة معترض علي تمريري التاج دة ليك
بس لما قلتلك تعمله مش قلتلك تلامض
ايه شوربة الفراخ دي

بس ايه حكاية الله يحرق اليهود دي

ههههههههههههههههه

شيل ام الورد فيرفيكيشن دي عشان بتعصبني وبتزهقني

مَلَكة يقول...

هه؟
نعم؟
يعني على رأي الأخ المبجل خالد الذكر اللمبي
ايه اللي جاب القلعة جنب النيل؟
تلاتة يامفتري؟
الله يحرق اليهوووود:D
طب انا هختار واحد بس واعمله عشان بحبهم انا
زبونة لقطة طبعا لصانعي التيجان مش كدة؟
يديك على أد نيتك يا عم محمد

Unknown يقول...

بما انك فاكر نفسك رخم و بتحاول تزنقنى فى التاجات
هطلع ارخم منك و مش هجاوب ههههههههه
حد يلاقى فرصة احسن من دى عشان يرخم عالناس و يرد؟؟
الاختلاف نخدمكم باحتراف
ههههههههههههه

محمد مصطفى يقول...

ازيك يا عزوووووووووو
و الله إنت حر ماتردش بس استحمل بقى

محمد مصطفى يقول...

العفو يا ست سمرا دانا مبسوووووووط جدا
جدا
جدا
و بعدين ما ربنا يحرق اليهود يا ستي إنتي إيه اللي مزعلك هو إنتي ليكي قرايب في تل أبيب

محمد مصطفى يقول...

سوسا
ربنا يسهل

محمد مصطفى يقول...

إزيك يا ملوكة عاملة إيه ؟؟
أنصحك تعملي التلاتة
بما إنك كده كده هتعملي يعني

محمد مصطفى يقول...

يا شيكو يا بنتي بلاش إنتي
أنصحك تقري الرد بتاعي على عز

tearwhispers يقول...

تاج دمه خفيف بجد
بس ايه الافترى اللى انت فيه ده
للدرجة دى الحقد و صل بيك تمرر 3 تاجات و لكل الناس دى

بس واضح انك مش بتدخل على البلوج من زمان
يلا مستنيين ابداعاتك

متغيرة شوية يقول...

احم احم

ازيك يا محمد

انا يعتبر عملت التاج زي ما أنت عايز بالظبط (وش واحد بيستهبل)

ايتها خدمة

محمد مصطفى يقول...

ازيك يا شاهي
لأ و الله هو مش حقد قوي هو ممكن تقولي إنه رغبة في الانتقام و بعدين يا بنتي سمرا لما مررت ال3 تيجان دول مررتهم لكل اللي متسجلين عندها يبقى أنا رحيم و لا لأ ؟؟!!

محمد مصطفى يقول...

سلمى
هنعديها المرادي

معاذ رياض يقول...

التاج اللي سعادتك بعته لسلمى وصل لي ..

حسبي الله ونعم الوكيل

لن أنسى لك هذا الموقف

:-)

محمد مصطفى يقول...

معاذ باشا
صدقني لو أعرف إنه هيتمررك بجد و من غير حلفان كنت برضو بعته
هو انا في ديك الساعة