افتعال غير مقصود لللحظة

الدنيا رقصة

و انت لسه متعلم الرقص ف يومين !!

فارقص كما شائت خطاك

ارتجل حركة خطاوي التوهة و اتعلم تعيش

- ضلمة المسرح تشيل خوفك من الجمهور -

فحاول تبدأ الرقص بهدوووووووووووووووووء

اتلف بالأيام

و حرك تلج إيدك نص دايرة

مسرحك لساه كبير

انتفض

عبي الضلام /

زحمة التفاصيل ف عينك /

لخمتك /

تصفيق محبيك اللي جي بدون تأثر من جانبهم /

و ابتسامة من عينيها

ضمن الرقصة ابتهال صوتها بإسمك

ضحك لبس العيد لضحك ايديكوا مع أول سلام

ارتسملها حرف s

و انتقص من خوف ملامحك ...

خطوة فاصلة بين عينيكوا

غافل الجمهور و حاول تبتسم

تبتسم ... تبتسملك

تنده الأيام ف عينها ... ترفضك

- تندهش من رد فعل مجاش ف بالك - ...

ترفضك

فارقص لوحدك

إيه تفيد الدهشة لو وقفت خطاك

نط و ارجع نص خشبة مسرحك

ابتسم

- و برغم كل مشاعر الحزن ف عينيك -

ابتسم

و انهي رقصك من سكات !!!

تمت في 7/11/2006